Хүүхдийн хэл яриа, сэтгэхүй хөгжих гол үндэс нь тэдэнтэй хамтран ажиллах, ярилцах, сонирхлыг нь дэмжих үйл явц юм. Эцэг эх, асран хамгаалагчид хүүхэдтэйгээ нас, хөгжлийн үе шатанд нь тохирсон бүтээлч үйл ажиллагааг тогтмол хийснээр тэдний сэтгэн бодох чадвар, бүтээлч байдал илүү хөгждөг.

Хүүхдийн хөгжлийн хамгийн чухал үе нь 5 хүртэлх нас бөгөөд энэ хугацаанд тэдний анхаарал төвлөрөл, гарын жижиг булчингийн хөгжил, танин мэдэхүйн суурь тавигддаг. Энэхүү номд багтсан харандаан зурлага, хайчлах, цэг холбох, будах зэрэг энгийн боловч үр дүнтэй дасгалууд нь хүүхдийн тархийг идэвхжүүлж, асуудал шийдвэрлэх, сонголт хийх чадварыг хөгжүүлэхэд чухал нөлөө үзүүлнэ.

Хүүхэдтэйгээ хамтдаа цагийг үр бүтээлтэй өнгөрөөх нь тэдний оюун ухаан, бүтээлч сэтгэлгээг хөгжүүлэх хамгийн үнэ цэнтэй хөрөнгө оруулалт билээ.